|
D'puis chtid qui vole edqu'à chtid qui courtrille,
Chtid qu'il escroque edqu'à chtid qui festrille,
In s'crot tertous à peu pris coume i feut,
S'in n'n' avoue ein, ch'est ein si tchout défeut,
Si tchout, si tchout, q'pour y truver à r'dire,
Fourot vraiment avoir cair à médire.
Si ch'n'étot l'honte ein peu qui l'ertarot,
A des tchouts saints j'cros qu'in s'récomparrot.
Mais ch'metchi-lo, jourd'hu, n'teintt' pus personne ;
L'metchi du diabe i duit à pusse ed monne.
Qaund i s'agit ed rougmeinter sin bien
Gn'a des cadets qui n'ercul't edvant rien.
Chés happ'chair-là; à l'conscieinche élastique,
Voul'reint l'bon Dghu, si l'lieux dounot s'pratique.
I dit't, et vlà quitzeine' ed leux raisons :
S'i gn'a des geins si bêtes qu'ed z'ésons,
Qui n's'inteint't pouant einn' seul'miotte in affouaire,
N'in feut t-i pau des malins poué s'z'erfouaire ?
Pourquo des geins si aisés à duper
S'in n'avaot pouant el drot d'ess z'attraper ?
Pour eq l'ein gagne i feut qu'ein eute i perche,
Ech grous brouchet mainj'ra toujours el perche.
Ej n'ai jamoua, qu'in dit , tué ni brûlé:
L'restant, s'lon eux, n'veut pouant l'poinn'd'in parler.
N'allez pau croire, ou moins, qu'echtid qui brule
I croich' manqui à quitzeind' einn' fistule.
"Si j'ai brulé ein viux toufion d'mason
Tout prêt à quère, ai-j pau ieu raison ?
Hein ? interr nous, qi'i s'dit ech bon brave homme,
J'ai infoncé s'z'assureux d'einn' bell'somme ;
Pour s'inrichir, i n'feut pau étt' doureux,
Pa' ch'temps qui quieurt, et ni étt' troup néreux.
Ch'qui m'gènn' s'peindant et m'fait vraiment d'el poine
Ch'est q'jai brûlé l'maison d'ech peuve Antoine,
Qui n'pourra pus, pour seur, rel'ver sin tot,
Pour tâchi d'mette ess tschott' nitée ou co ;
Nous masons s'tienn't, et, pour roûtir el mienne,
Il a foulu fricasser oussi l'sienne.
Ch'est malhéreus : echt'heure il est troup tard ;
Ej pouvos-t-i manqui ein bon hasard,
Pour moinagi,s'i vous plait, ess bocoque ?
Mais ch' n'est pau cha qui l'pusse i m'interloque ;
J'ai su' l'conscienche ein viux bonhomm' brulè...
Qui q'ch'est q'jai dit!...n'm'inteind-on pouant parler ?
Gn'a t-i pau là quitt' curieux qu'il acoute ?
Nous savons bien qu'i n'y voyot pus goutte,
Qu'ech viux grand'père étot ou d'hout d's'in queu,
Et qu'ej n'ai pau avanchi s'mort d'héqueu;
I pouvot coire aller ein an à poine,
Coume i pouvot enn pus aller qu'einn' s'moine.
Qu'est-ch' qui sait mêmm' si toute i n'étot dit
Edvant qu'ech fu il euch' gagni sin lit,
Et s'i n'avot edpuis einn' tchote espace
Déjà douné ech queu d'pied à l'paillasse ?
Chi ch'étot vra, j'éros bien moins péchi,
Ej n'éros pus grand cose à m'erprouchi."
-Vlà coumm' chaqueini diminué ses feutes,
Tout in tâchant ed hagni l'bien d'ess z'eutes ;
In vourot coire avoir l'air vertueux ;
Mais l'air seul'meint, cha suffit pour béqueux.
D'vol et d'rapaine in implisant ses poches,
Ch'vouleux n'érot pouant mérité d'z'erproches;
Mais chtid qui vot in travers chés palis
N'trouvara pouant, li, si blancs q'des suplis
Chés metteux d'fu, chés fricasseux d'villages.
I vous aguide, allez, du heut d'chés nuages ;
Muchez-vous bien, preindrez vous préqueutions,
Vous n's'rez pau moins punis d'vous bell' z'actions !
Tout comme ein ver ou fond d'ein toufion d'pomme,
L'ermords est là qui rogne ed cair ed l'homme,
S'rot-t-i seigneur, évêque, imp'reur ou Ro,
S'il a l'malheur de n'pau chuire exh q'min dro'.
Vous in riez, echt'heure eq vous étt' jonne....
Pus tard.... patieinche ! eq vou tête al' grisonne,
Et vous voirez, ou cantour ed la mort,
Combien q'ch'est dur à digérer... du r'mord' !
CRINON Hector - Satires picardes
et autres oeuvres .
|
Précédent
Retour